2011, ഫെബ്രുവരി 1, ചൊവ്വാഴ്ച

ഒരു ലളിതഗാനം

2011 ഫെബ്രുവരി 01ചൊവ്വ
ബ്ലോഗില്‍ ഒരു പോസ്റ്റിട്ടിട്ട് ഇന്നേക്ക് കൃത്യം 9 മാസം 10 ദിവസം 11 മണിക്കൂര്‍ 56 മിനുട്ട്.
കഴിഞ്ഞ പോസ്റ്റിനുശേഷം പാടി റെക്കോര്‍ഡ് ചെയ്ത ഗാനങ്ങള്‍ ഒരു അമ്പതെങ്കിലും വരും. ഇത്രയും പാട്ടുകള്‍ ഇത്ര ചുരുങ്ങിയ കാലം കൊണ്ട് ഞാന്‍ വേറെ റെക്കോര്‍ഡ് ചെയ്തിട്ടില്ല. പക്ഷേ, ഒന്നുപോലും ബ്ലോഗില്‍ പോസ്റ്റ് ചെയ്യാന്‍ തോന്നിയില്ല. കാരണം, അതില്‍ ഒന്നുരണ്ടെണ്ണം ഒഴികെബാക്കിയെല്ലാം രാഷ്ട്രീയ - പാരഡി ഗാനങ്ങളായിരുന്നു :) എല്ലാം പഞ്ചായത്ത് ഇലക്ഷനില്‍ മത്സരിക്കുന്ന സ്ഥാനാര്‍ത്ഥികള്‍ക്കുവേണ്ടി ചെയ്തത്. ബ്ലോഗില്‍ പോസ്റ്റ് ചെയ്തില്ലെങ്കിലും പാരഡി ഗാനങ്ങള്‍ റെക്കോര്‍ഡ് ചെയ്തതുകൊണ്ട് ഒരു ഗുണമുണ്ടായി. ഒരു പ്രൊഫഷണള്‍ സൗണ്ട്കാര്‍ഡ് വാങ്ങാന്‍ സാധിച്ചു. 

സ്ഥാനാര്‍ത്ഥികളില്‍നിന്നും പിഴുഞ്ഞുണ്ടാക്കിയ രൂപയില്‍നിന്നും ഒരു പതിനയ്യായിരം കൊടുത്ത് ഒരു M Audio Fast Track Pro സൗണ്ട്കാര്‍ഡും SENNHEISERന്റെ ഒരു പ്രൊഫഷണല്‍ ഹെഡ്‌സെറ്റും വാങ്ങി.അതുവെച്ച് കുറച്ചു പാട്ടുപാടി റെക്കോര്‍ഡ് ചെയ്യണമെന്നൊക്കെയുണ്ടായിരുന്നെങ്കിലും നല്ലൊരു മൈക്ക് കൈയിലില്ലാത്തതുകൊണ്ട് റെക്കോര്‍ഡിംഗ് വീണ്ടും പഴയ ഹെഡ്‌സെറ്റ് കം മൈക്കിലേക്കു തന്നെ മാറി. സൗണ്ട്കാര്‍ഡ് ഒരു സൈഡിലാവുകയും ചെയ്തു.
ഇതിനിടക്കാണ് കേരളോത്സവം വന്നത്. പഞ്ചായത്ത് കേരളോത്സവത്തിനു പാടാന്‍ ഒരു ലളിതഗാനമൊക്കെ പഠിച്ചു. പാടാന്‍ റെഡിയായി വന്നപ്പോള്‍, പ്രസ്സില്‍ അന്ന് പതിവിലും കൂടുതല്‍ തിരക്ക്. എന്തു ചെയ്യും? ലളിതഗാനത്തിന് പേര് വിളിക്കുമ്പോള്‍ റിപ്പോര്‍ട്ട് ചെയ്യാന്‍ ക്ലബ്ബിലെ ഒരു സുഹൃത്തിനെ ഏര്‍പ്പാടാക്കി ഞാന്‍ പ്രസ്സിലേക്കു വിട്ടു. മത്സരം തുടങ്ങി അവസാനമാവുമ്പോഴേക്കും ഓടിയെത്താനായിരുന്നു പ്ലാന്‍... റിപ്പോര്‍ട്ടിംഗിന് ഏറ്റവന്‍ 'ശുശ്കാന്തി' കാണിച്ചു, ലളിതഗാനം വിളിച്ചപ്പോള്‍ നമ്പര്‍ വണ്‍ ആയിത്തന്നെ അവന്‍ റിപ്പോര്‍ട്ട് ചെയ്തു. പിന്നെ, അറിഞ്ഞത് ലളിതഗാനം തുടങ്ങിയെന്നല്ല, പേര് വിളിച്ചു ആബ്‌സന്റ് ആയതിനാല്‍ അടുത്ത ചെസ്റ്റ് നമ്പര്‍ വിളിച്ചുവെന്നാണ്. എങ്കിലും ഓടിക്കിതച്ചുചെന്നു. കിതച്ചുകൊണ്ടുതന്നെ സ്‌റ്റേജില്‍ കയറി. പഠിച്ചതില്‍നിന്നു മാറി വേറെ ഏതോ പിച്ചില്‍ പാട്ടുംപാടിപ്പോന്നു.. റിസള്‍ട്ട് വന്നപ്പോള്‍ തേര്‍ഡ് എന്നു കേട്ടപ്പോള്‍ ഞാന്‍ തന്നെ ഞെട്ടിപ്പോയി... ഇനി നിങ്ങളുടെ വിധികൂടി കേള്‍ക്കാന്‍.., ഇതൊന്നു കേട്ടുനോക്കൂ...




കാവില്‍ തേന്‍ തിരയും (ലളിതഗാനം)
പാടിയത്: കെ.എസ്. ചിത്ര (AIR നു വേണ്ടി)
കൂടുതല്‍ ഡീറ്റെയില്‍സ് അറിയില്ല:)








Get this widget | Track details | eSnips Social DNA

2010, ഏപ്രിൽ 22, വ്യാഴാഴ്ച

ഒറിജിനലിനെ വെല്ലുന്ന ഡ്യൂപ്ലിക്കേറ്റ്‌...!!

ഇന്റർനെറ്റു വഴി എനിക്ക് ഒരുപാട് സുഹൃത്തുക്കളെ കിട്ടിയിട്ടുണ്ട്. പക്ഷേ, അതിൽ എനിക്കേറ്റവും ഇഷ്ടപ്പെട്ട എന്റെ സുഹൃത്ത് നിലമ്പൂർ സ്വദേശി ഷാഹിറിന്റെ ഒരു പാട്ടാണ് ഈ പോസ്റ്റ്. യാഹൂ ചാറ്റ് റൂം വഴിയാണ് ഞങ്ങൾ പരിചയപ്പെടുന്നത്. അന്നുതന്നെ ഞാൻ അവന്റെ വോയ്സ് നോട്ടു ചോയെതിരുന്നു. പിന്നീട് ഒന്നുരണ്ടു പ്രാവശ്യം നേരിൽ കാണാൻ‌ സാധിച്ചു. അതിനിടക്കാണ് ഞാൻ പാട്ടുപാടി റെക്കോർഡ് ചെയ്തിരുന്ന അഡോബി ഓഡീഷൻ ഞാൻ അവന് പരിചയപ്പെടുത്തുന്നതും അവന്റെ വീടലെ സിസ്റ്റത്തിൽ റെക്കോർഡിംഗ് കാണിച്ചുകൊടുക്കുന്നതും. പറഞ്ഞുകൊടുത്തു ഒരു മണിക്കൂർ കഴിഞ്ഞുകാണില്ല, ഞാൻ വീട്ടിലെത്തിയപ്പോഴേക്കും അവന്റെ ആദ്യത്തെ പാട്ട് റെഡി. അപ്പോൾത്തന്നെ മെയിലിൽ അയച്ചുതന്നു.. 
പാട്ടു കേട്ട് ഞാൻ ശരിക്കും ഞെട്ടിപ്പോയി, ശങ്കർ മഹാദേവന് ദേശീയ അവാർഡ് ലഭിച്ച താരേ സമീൻ പർ എന്ന ഹിന്ദി ചിത്രത്തിലെ മേരി മാ എന്ന ഗാനം ശങ്കറിനേക്കാൾ നന്നായി ഇവൻ പാടിയോ എന്നു തോന്നിപ്പോയി. 
ഇപ്പോൾ ബാംഗ്ലൂരിലെ ഒരു സ്വകാര്യ കമ്പനിയിൽ ജോലിനോക്കുന്ന ഷാഹിർ ബി.ടെക് ബിരുദധാരിയാണ്.

.മേരി മാ 
Film: താരേ സമീന്‍ പര്‍
Lyrics: പ്രസൂണ്‍ ജോഷി
Music: ശങ്കര്‍-ഇഹ്‌സാന്‍-ലോയ്‌
Original Sung by: ശങ്കര്‍ മഹാദേവന്‍
Sung by : ഷാഹിര്‍
Recorded & Mixed by: ഷാഹിര്‍


|
|

2010, മാർച്ച് 17, ബുധനാഴ്ച

ഇന്നൊരു പോസ്‌റ്റിട്ടിട്ടുതന്നെ കാര്യം

ഇതെവിടേക്കാ ഇത്ര തിരക്കിട്ട്‌ ഓടുന്നത്‌? പോയിട്ടെന്താ ഇത്ര വല്യ പണിയുള്ളത്‌ അവിടെ? അല്ലേയ്‌, സമയത്തിന്റെ ഒരു കാര്യം, കുറേ ഓടിനോക്കി, കൂടെ. ഒരു രക്ഷയുമില്ല.
പുതിയൊരു പോസ്‌റ്റിടണമെന്നു കരുതി പാട്ടൊക്കെ റെഡിയാക്കിവെച്ചിട്ട്‌ കുറച്ചു ദിവസമായി. മനസ്സമാധാനത്തോടെയിരുന്ന്‌ അതൊന്നു പോസ്‌റ്റ്‌ ചെയ്യണമെന്നു വിചാരിച്ചിട്ട്‌ നടക്കണ്ടേ...? സമയം തന്നെ പ്രശ്‌നം. ഈയിടെയായി ഒരു ദിവസം 24 മണിക്കൂര്‍ തികയുന്നില്ലേ എന്നൊരു സംശയം. അല്ല, എല്ലാം മറിച്ചുവില്‍ക്കുന്ന കാലമല്ലേ... വിശ്വസിക്കാന്‍ പറ്റില്ല, ഒന്നിനേം.
ഇനി പോസ്‌റ്റിലേക്ക്‌, കുറച്ചു കാലമായുള്ള ഒരു ആഗ്രഹത്തിന്റെ സഫലീകരണമാണ്‌ ഈ പോസ്‌റ്റ്‌. കൂടെപ്പാടാന്‍ ആളില്ലാത്തതിനാല്‍, ശ്രേയയുടെ കൂടെയാണ്‌ കഴിഞ്ഞ തവണ പാടിയത്‌ :) ഇത്തവണ കൂടെപ്പാടുന്നത്‌ ഒറിജിനല്‍ പാട്ടുകാരി തന്നെയാണ്‌. (ശ്രേയ ഒറിജനിലല്ലെന്നല്ല കേട്ടോ, റെക്കോര്‍ഡഡ്‌ അല്ലാത്തത്‌ എന്നാണ്‌ ഉദ്ദേശിച്ചത്‌) പുതുമുഖ അഭിനേതാക്കളെയും പുതുമുഖ ഗായികാ-ഗായകന്മാരെയും അണിനിരത്തി പുതുമുഖ സംവിധായകന്‍ ശശികുമാര്‍ എഴുതി നിര്‍മ്മിച്ച്‌ സംവിധാനം ചെയ്‌ത സുബ്രഹ്മണ്യപുരം എന്ന ചിത്രത്തിലെ കണ്‍കള്‍ ഇരണ്ടാല്‍ എന്ന ഗാനമാണ്‌ ഇത്തവണത്തെ പോസ്‌റ്റ്‌. 1980കളിലെ യുവാക്കളുടെ കഥപറയുന്ന ഈ ചിത്രത്തിന്റെ ഒരു ഹൈലൈറ്റ്‌ തന്നെയാണ്‌ ഈ ഗാനം. ഈ ഒരു നൊസ്റ്റാള്‍ജിയ നിലനില്‍ക്കുന്നതുകൊണ്ടുതന്നെ മിക്കവര്‍ക്കും ഇഷ്ടപ്പെട്ടൊരു പാട്ടാണിതെന്നറിയാം. അതുകൊണ്ടുതന്നെ ഇതൊരു വലിയ പരീക്ഷണവുമാണ്‌.
ജെയിംസ്‌ വാസന്തന്റെ സംഗീതസംവിധാനത്തില്‍ ബെല്ലിരാജ്‌, ദീപ മറിയം എന്നിവര്‍ ചേര്‍ന്നു പാടിയിരിക്കുന്ന ഈ ഗാനം എന്റെ കൂടെ പാടിയിരിക്കുന്നത്‌ എന്റെ എന്റെ കസിനും ഇപ്പോള്‍ രണ്ടാംവര്‍ഷ ബിരുദ വിദ്യാര്‍ത്ഥിനയുമായ ശാദിയ ആണ്‌. ബ്ലോഗിലേക്കുള്ള അവളുടെ കാല്‍വെപ്പുകൂടിയാണ്‌ ഈ ഗാനം. ആശിര്‍വദിക്കുക.., അനുഗ്രഹിക്കുക...  


കണ്‍കള്‍ ഇരണ്ടാല്‍
Film: സുബ്രഹ്മണ്യപുരം
Lyrics: താമരൈ
Music: ജെയിംസ്‌ വാസന്തന്‍
Original Sung by: ബെല്ലിരാജ്‌ & ദീപ മറിയം
Sung by : റസീസ്‌ അഹമ്മദ്‌ & ശാദിയ
Recorded & Mixed by :റസീസ്‌ അഹമ്മദ്‌

Rasees Ahammed_ent...

ഈ ഗാനം ഡൗണ്‍ലോഡ്‌ ചെയ്യാം
വരികള്‍ ഇവിടെ

2009, ഡിസംബർ 18, വെള്ളിയാഴ്ച

എന്റെ പാട്ടന്വേഷണ പരീക്ഷണം


കുറേ നാളായി ഒരു പോസ്‌റ്റ്‌ ഇടണമെന്നു വിചാരിക്കുന്നു. ചില സാന്ദര്‍ഭിക കാരണങ്ങളാല്‍ നീണ്ടുപോയി. എവിടെയായിരുന്നാലും ഇന്റര്‍നെറ്റ്‌ കണക്ട്‌ ചെയ്യാനായി ഞാന്‍ വാങ്ങിച്ചിരുന്ന ഐഡിയ നെറ്റ്‌ സെറ്റര്‍ ആരോ അടിച്ചുമാറ്റിയതു കാരണം ഫുള്‍ടൈം ഓണ്‍ലൈനായിരുന്നത്‌ ദിവസത്തിലെപ്പോഴെങ്കിലും എന്തെങ്കിലും ആവശ്യത്തിന്‌ കഫേയില്‍ കയറുമ്പോള്‍ മാത്രമായി ചുരുങ്ങി. ഇപ്പോള്‍ രണ്ടും കല്‍പ്പിച്ച്‌ വീട്ടിലെ കംപ്ലയിന്റായിക്കിടന്നിരുന്ന ബ്രോഡ്‌ബാന്റ്‌ കണക്ഷന്‍ നന്നാക്കി വീണ്ടും വിഹാരം തുടങ്ങി. അതിന്റെ റിസള്‍ട്ടെന്നോണം ആദ്യമാസത്തെ ബില്‍ തന്നെ നല്ലൊരു സംഖ്യ പ്രതീക്ഷിച്ചിരിക്കുകയുമാണ്‌.
ഇനി പാട്ടിനെക്കുറിച്ച്‌. ഒരു യുഗ്മഗാനം പാടി റെക്കോര്‍ഡ്‌ ചെയ്യണമെന്ന്‌ കുറേനാളായുള്ള ആഗ്രഹമായിരുന്നു. പക്ഷേ, നമ്മുടെ കൂടെ പാടാന്‍ ആരെങ്കിലുമൊന്ന്‌ വരണ്ടേ..? അങ്ങനെയിരിക്കുമ്പോഴാണ്‌ ഇങ്ങനെയൊരു ആശയം മനസ്സിലുദിച്ചത്‌. ഏതെങ്കിലുമൊരു ഡ്യുവറ്റ്‌ പാട്ടെടുത്ത്‌ അതില്‍നിന്ന്‌ മെയില്‍പോര്‍ഷന്‍ കട്ട്‌ ചെയ്‌ത്‌ പാടിനോക്കാമെന്ന്‌, ഒരു പരീക്ഷണം.. അങ്ങനെയാണെങ്കില്‍ പിന്നെ മോശമാക്കേണ്ടെന്നു കരുതി, എ.ആര്‍ റഹ്‌മാന്റെ മ്യൂസിക്കില്‍തന്നെയാവട്ടെ, അതും ശ്രേയാ ഘോഷലിന്റെ കൂടെ. എനിക്കേറ്റവും ഇഷ്ടപ്പെട്ട ഗാനങ്ങളിലൊന്നുതന്നെ തെരഞ്ഞെടുത്തു.
പാട്ടും കരോക്കെയും കറക്ട്‌ ടെംപോയില്‍ മിക്‌സ്‌ ചെയ്‌തെടുക്കാന്‍ ഒരു ദിവസത്തിലേറെ വേണ്ടിവന്നു. പാട്ട്‌ പാടിയെടുക്കാനൊരു ദിവസവും.. അങ്ങനെ രണ്ട്‌ മുഴുദിവസത്തെ അദ്ധ്വാനഫലമാണിത്‌. അഭിപ്രായമറിയിക്കാന്‍ മറക്കില്ലല്ലോ..

മുന്‍പേവാ എന്‍ അന്‍പേ വാ
Film: ജില്ല്‌നു ഒരു കാതല്‍
Lyrics: വാലി
Music: എ ആര്‍ റഹ്‌മാന്‍
Original Sung by: നരേഷ്‌ അയ്യര്‍ & ശ്രേയ ഘോഷല്‍
Sung & Mixed by : റസീസ്‌ അഹമ്മദ്‌


Get this widget | Track details | eSnips Social DNA

ഈ ഗാനം ഡൗണ്‍ലോഡ്‌ ചെയ്യാം
വരികള്‍ ഇവിടെ

2009, സെപ്റ്റംബർ 28, തിങ്കളാഴ്ച

മൗനമേഘങ്ങളേ.. ശാന്തതീരങ്ങളേ...

രണ്ടുമൂന്ന്‌ വര്‍ഷം മുമ്പത്തെ കഥയാണ്‌. ഖത്തറിലുള്ള സുഹൃത്ത്‌ റിയാസിന്റെ അനുജന്‍ ഒരു ഷോട്ട്‌ഫിലിം (സിഡിഫിലിം) നിര്‍മ്മിക്കുന്നു. അതിലേക്ക്‌ ഒന്നുരണ്ട്‌ പാട്ട്‌ വേണം. അവന്‍ കുറേയായി പറയാന്‍ തുടങ്ങിയിട്ട്‌. റിയാസിനോട്‌ സംസാരിച്ചിരുന്നു എന്നും പറഞ്ഞു. പക്ഷേ, ഞാന്‍ അധികം മൈന്‍ഡ്‌ ചെയ്യാന്‍ പോയില്ല. കാരണം, ഇവനിത്‌ ആദ്യമായിട്ടൊന്നുമല്ല, ഇതിനുമുമ്പും ചെറിയ ഷോട്ട്‌ ഫിലിമുകളൊക്കെ ഇറക്കിയിട്ടുണ്ട്‌, അവന്റേതായ സ്റ്റൈലില്‍.. അവന്റെ പ്രായം വെച്ചു നോക്കുമ്പോള്‍ നിലവാരമില്ലെന്നു പറയാന്‍ പറ്റില്ല. എന്നാലും എനിക്കെന്തോ ഒരു മടി.
അങ്ങനെയിരിക്കുമ്പോള്‍ ഒരുദിവസം റിയാസ്‌ വിളിച്ചപ്പോള്‍ അനുജന്റെ ഷോട്ട്‌ഫിലിമിനെക്കുറിച്ച്‌ സംസാരിച്ചു. ഞങ്ങള്‍ സംസാരിക്കാന്‍ തുടങ്ങിയാല്‍ പിന്നെ അങ്ങനെയാണ്‌. വല്യ വല്യ പദ്ധതികള്‍ രൂപം കൊള്ളും. :), അവസാനം എവിടെയെത്തുമെന്ന്‌ പറയാന്‍ പറ്റില്ലെങ്കിലും... ആ സംസാരത്തിലും ചര്‍ച്ച കാടുകയറി, അങ്ങനെ, പാട്ട്‌ തലയില്‍ക്കയറി.. റിയാസ്‌ പാട്ട്‌ എഴുതി മംഗ്ലീഷില്‍ ടൈപ്പ്‌ ചെയ്‌ത്‌ ഇമെയില്‍ അയച്ചുതന്നു. ഞാന്‍ അത്‌ പ്രിന്റെടുത്ത്‌ എന്റെ സംഗീതാധ്യാപകന്‍ മുഹ്‌‌സിന്‍ കുരിക്കളെ ഏല്‍പ്പിച്ചു. അദ്ദേഹം പേപ്പര്‍ വാങ്ങി ഒരു രണ്ടുമൂന്ന്‌ മിനുട്ട്‌ അതിലേക്ക്‌ നോക്കി. ഗിറ്റാറില്‍ പുതിയൊരു ഈണം വായിച്ചുതന്നു. അങ്ങനെ പുതിയൊരു പാട്ടു പിറന്നു. നമ്മളെഴുതിയാലും പാട്ടാകുമെന്ന്‌ റിയാസിനും ബോധ്യമായി. ഞാന്‍ ആദ്യമായി റെക്കോര്‍ഡിംഗ്‌ സ്റ്റുഡിയോയില്‍ കയറി പാടുകയും ചെയ്‌തു... ഇപ്പോഴിതാ ആ ഗാനം നിങ്ങളുടെ മുമ്പിലും സമര്‍പ്പിക്കുന്നു,



മൗനമേഘങ്ങളേ ശാന്തതീരങ്ങളേ
രചന: റിയാസ്‌ ബാബു
സംഗീതം: മുഹ്‌സിന്‍ കുരിക്കള്‍ മഞ്ചേരി
ആലാപനം: റസീസ്‌ അഹമ്മദ്‌

റെക്കോര്‍ഡിംഗ്‌ & മിക്‌സിംഗ്‌: ആവാസ്‌ ഡിജിറ്റല്‍, മഞ്ചേരി
കീബോര്‍ഡ്‌: മുഹ്‌‌സിന്‍ കുരിക്കള്‍ മഞ്ചേരി
റിഥം: ബാബു പവിഴം
തബല: അക്‌ബര്‍

Get this widget | Track details | eSnips Social DNA

ഈ ഗാനം ഡൗണ്‍ലോഡ്‌ ചെയ്യാം
വരികള്‍ ഇവിടെ

2009, സെപ്റ്റംബർ 17, വ്യാഴാഴ്ച

ഈദ്‌ മുബാറക്‌

ഒരു മാസക്കാലത്തെ വ്രതാനുഷ്‌ഠാനത്തിന്‌ പരിസമാപ്‌തി കുറിച്ചുകൊണ്ട്‌ മാനത്ത്‌ ആഹ്ലാദത്തിന്റെ പൊന്നമ്പിളി തന്ന്‌ റമദാന്‍ പടിയിറങ്ങുമ്പോള്‍... എന്റെ ചെറിയൊരു പെരുന്നാള്‍ സമ്മാനം...
'സമ്മാനപ്പൊതി' അഴിച്ചുനോക്കിയ ശേഷം ഇഷ്ടപ്പെട്ടോ എന്ന്‌ അറിയിക്കാന്‍ മറക്കരുതേ...

(സ്വതസിദ്ധമായ ശൈലികൊണ്ട്‌ സംഗീത പ്രേമികളുടെ മനസ്സിലിടം നേടിയ ഗായകന്‍, അഫ്‌സല്‍ ആലപിച്ച നിലാവ്‌ എന്ന്‌ ആല്‍ബത്തിലെ ഒരു ഗാനമാണ്‌ ഇപ്രാവശ്യത്തെ പോസ്‌റ്റ്‌)



അല്ലാ അഹദേ യാ...
Sung &Mixed: റസീസ്‌ അഹമ്മദ്‌
Origanly Sung by: അഫ്‌സല്‍
ആല്‍ബം: നിലാവ്‌ 2


Get this widget Track details eSnips Social DNA

ഈ ഗാനം ഡൗണ്‍ലോഡ്‌ ചെയ്യാം
വരികള്‍ ഇവിടെ

2009, സെപ്റ്റംബർ 14, തിങ്കളാഴ്ച

തുടങ്ങട്ടെ, അനുഗ്രഹിക്കുക...

ഓ, അവസാനം അത്‌ സംഭവിച്ചു.
ദിവസങ്ങള്‍ കുറേയായി ഇതിനു പിന്നാലെ നടക്കുന്നു. വര്‍ഷം ഒന്നാവാറായി ഈ ശ്രമം തുടങ്ങിയിട്ട്‌. സുഹൃത്തുക്കളോടും പരിചയമുള്ള ബ്ലോഗര്‍മാരോടുമൊക്കെ അന്വേഷിച്ചു. പലരും പല വഴികളും പറഞ്ഞുതന്നു. പക്ഷേ, ഒന്നും നടപ്പാക്കാന്‍ മാത്രം കഴിഞ്ഞില്ല. ഗൂഗിളമ്മാവനോട്‌ അന്വേഷിച്ചുനോക്കി. വീണ്ടും പലരുടെയും സഹായം തേടി. അവസാനം ഇതാ, അത്‌ സംഭവിച്ചിരിക്കുന്നു. ഓഡിയോ പോഡ്‌കാസ്‌റ്റിംഗ്‌ ഞാനും പഠിച്ചെടുത്തു.
നേരിട്ടും അല്ലാതെയും സഹായിച്ചവര്‍ നിരവധിയാണ്‌. ആര്‍ബി, മൂള്ളൂക്കാരന്റെ ഇന്ദ്രധനുസ്‌
തുടങ്ങി പലരും. എല്ലാവര്‍ക്കും നന്ദി.
പക്ഷേ, തിരക്കേറിയ സമയത്തിന്റെ നല്ലൊരു ഭാഗം എനിക്കായി മാറ്റിവെച്ച്‌ സഹായിച്ച ബ്ലോഗര്‍, മലയാളിക്ക്‌ പ്രത്യേകം നന്ദി അറിയിക്കുന്നു.
പേരുപറയാന്‍ ആഗ്രഹിക്കാത്ത ഒരു സുഹൃത്തിന്റെ ഏറ്റവും ഇഷ്ടപ്പെട്ട ഗാനമാണ്‌ ആദ്യത്തെ പോസ്‌റ്റ്‌. പയനങ്കള്‍ മുടിവതില്ലൈ എന്ന തമിഴ്‌ ചിത്രത്തിനുവേണ്ടി ഇളയരാജ സംഗീതം നല്‍കി എസ്‌.പി.ബാലസുബ്രഹ്മണ്യം പാടിയ ഗാനം. അഭിപ്രായം അറിയിക്കുമല്ലോ.

Get this widget Track details eSnips Social DNA

ഈ ഗാനം ഡൗണ്‍ലോഡ്‌ ചെയ്യാം
വരികള്‍ ഇവിടെ